神秘的煙雲 やるしかないよ

前日我響銅鑼灣過緊馬路嘅時候，聽島有個女人講：『呢條都好癬，好靚。』然後有個男聲講：『拿，呢條呢就去宴會帶，咁呢…』我冇留心聽啦，你估我真係咁得閒咩。但個女的再講多次；『呢條真係好癬，好靚，佢真係好癬。』基于呢個咁特別嘅發音，我就刻意放慢腳步等佢地行先(因為佢地原本響我後面，我冇理由真係冇啦啦擰轉180度望佢地假)。

只見佢地係一男一女，男的係香港典型阿叔(即係好似我咁樣，或者好似瘋魔一時嘅巴士阿叔咁款)，女的，明顯地係異地女子。我費時講明係點樣異地法啦，大家自己去估。我睇唔到佢地個樣，不過從背面嘅髮膚睇黎，佢地年紀相差至少30至40年。而佢地係拖著手嘅夫妻款。

有時我諗，其實情情愛愛，都係呃呃tum tum，咁就一世。我比較少聽島有香港女仔響街到大讚佢老公或佢老公送嘅禮物，反而我成日響街見島有情侶鬧交。當然，剛才的異地戀主角可能返到屋企都會互斬互劈，但從那嬌柔而不做作的聲音中，至少呢條異地女係想表達出佢真係好鐘意好鐘意嗰條嘢(我估係頸鍊，或鎖鏈，不過冇理由帶鎖鏈去宴會)，當然佢心底裡諗乜嘢，或者係想以呢種讚美去得島乜嘢，我就唔知啦，我諗阿叔都唔知。

講真，佢咁樣公開地癬，我係那阿叔，都真係好lum。幾句嘢，就可以令男人充滿自信，覺得俾島幸福條女，咁真係好滿足。有時，你都唔怪得有些人去異地娶老婆，尤其是係物價指數較低的異地。你話，如果到五六十歲都係禾趕草王老五，月入數千，咁我可以去邊以價廉物美嘅嘢，換取島即使連自己都覺得假假地的成功感。

算啦，大家不如學學上一輩人，騙來騙去，相依到老。真乜嘢愛，激乜嘢情呀。得閒不如留番啖氣，讚你老公『嘩真係好勁呀』，讚你老婆『嘩真係好索呀』。真乜鬼愛呀，拍戲咩？

睇黎我都要renew定某種旅遊證件先。